أيه هو الحب

أية هو الحب يا جماعة سؤال حيرني كتير:
الحب أنك تحب وخلاص وبعدين تحاول تخلي الي بتحبه يحبك , ولا أنك تعرف أن حد بيحبك فمترضاش تكسر(تكسري بخاطره) , ولا هو تفاهم وخلاص , ولا الحب دة معدش موجود دلوقتي عشان بيتفهم غلط , وأزاي تخلو آخر الحب أرتباط مش تكونو صحاب وخلاص ؟؟؟؟؟؟؟؟؟؟؟؟؟؟؟؟؟؟

(و أزاي الشاب يحب وحدة من بتوع البنطلونا الرش والبنطلونات الساقطة)
(وأزاي البنت تتعلق بالشاب إلي ماشي وناسي بنطلونه وإلي بيكهرب شعرة وإلي دلوقتي بيلبسو طرح(سكارف))؟؟؟؟؟؟؟؟؟؟؟؟؟؟؟؟

اقولك انا يعني ايه حب بجد وبجد خذ كلامي ده ثقه لاني فعلا هكلمك بصراحه مطلقه علشانك وعلشان اللي عايز يحب وخايف او اللي نفسه يحب

اولا كل اللي انت قلته ده مش حب خالص والحب ميعرفش كلمه ( وخلاص)
هقولك الاول يعني ايه حب من البدايه
الحب يعني من البدايه خالص اتنين شافو بعض اعجبو ببعص او حسو ان بينهم تفاهم وقررو يحبو بعض بجد(حب حقيقي نهايته جواز)
بعد كده لازم لازم لازم الاتنين يحكو كل حاجه خاصه بيهم لبعض ويتفقوا على الصراحه المطلقه وكل طرف يحكي للطرف التاني هو بيحب ايه وبيكرهه ايه وايه ( بينرفذه ) وكل الحاجات ( هو ده مفتاح الحب الحقيقي )
بعد كل الكلام ده لازم كل طرف في البدايه يقعد مع نفسه ويفكر في التاني وهل هو بيعامله حلو وهل هو حاسس انه بيعمل حاجه زعلت منه حبيبه ولو كانت الاجابه بنعم حصل يبقى لازم يغير فورا من نفسه الحاجه الغلط اللي حصلت
بعد كده يقعدو مع بعض كل فتره هما يحددوها ممكن في الاول كل اسبوع او اسبوعين يتكلمو فيها بصراحه مع بعض وكل واحد يصارح التاني باي حاجه حصلت ضايقته وزعلته ولازم في نهايه الاعده يوصلو لحل جذري لو لقدر الله حصلت مشكله
ده كده اللي لازم يحصل في البدايه ده لو النيه حب بجد
بعد متعدي فتره سنه يعني لازم يحصل تجديد باي شكل او اي طريقه ممكن حفله او ( هدايا ) او الولد ياخد خطوه والبنت كمان يعني الاهل لازم تعرف ده لو مكنوش يعرفوا وكده يعني

ثانيا هوضحلك عيوب الحب الحقيقيه والسبب في المشاكل
- كلام الناس ( ومحدش يقولي لو في ثقه يبقى مش مهم كلام الناس )
اللي يحب مالهوش دعوه غير باللي يشوفه ويحسه بس ويعتبر نفسه مش بيسمع ولو حد من الطرفين شك في حاجه ناحيه حبيبه ع طول من غير تفكير يحكيلوه عليها ويتناقشه ولازم يوصلو لحل يرضي الطرفين
- الغيره السلبيه يعني الغيره عمال ع بطال اعتقد واضحه مش محتاجه شرح
- الكذب وغالبا بيكون الموضوع ده بسبب ان ممكن حاجه تحصل ممكن تزعل اللي بيحبه فميحكلهوش عليها او يكذب فيها او يداريها بحجه انه مش عايز يزعل حبيبه وده عيب غالبا بيكون في الاولاد اكتر من البنات
- المقارنه وده موجود في البنات اكتر من الاولاد يعني مثلا لو البنت اتكلمت مع صاحبتها او ايا كانت مخطوبه او غيره وحكيتلها ان خطيبها وداها في مكان معين عجبها او هديه غاليه او اي نوع من الاغراءات دي فاللي بتسمع هتقول يبختها ياريتني مكانها او هتقول لنفسها هو ليه مبيعملش كده وتفكر انها تقوله فلما تيجي تقوله توصل بطريقه غلط او في وقت مش مناسب فتحصل مشكله وكده يعني والعكس طبعا في الشباب مع اختلاف المواضيع
- حب الامتلاك يعني لازم كل اتنين بيحبو بعض يعرفو ان مش لوحدهم عايشين في الدنيا
- العيب ده موجود بس مش كتير واللي هو حب الذات او ان الولد يبقى عايز يعمل قدام البنت راجل وحاجه محصلتش والعكس طبعا

بالنسبه للعيوب العاديه اللي هي التعب والارق والسهر والخوف والقلق بس كل الحاجات دي بالنسبالى حلوه لانها دليل على الحب الحقيقي

اما بقى بالنسبه لمميزات الحب فهي اي احساس حلو تحس بيه ايا كان نوعه
وكمان طبعا لما تكون ليك هدف وكيان ولقيت حد يشاركك كل حاجه في حياتك وحد تحكيله اللي جواك وتخاف عليه وانك تكون مسئول عن حد وحاجات كتييييييييييييير جدا جدا جدا
بجد مفيش كلا اقدر اوصفلك بيه جمال الحب لان بجد الحب احساااااس بس لو كان حقيقي
على فكره كل اللي انا قلته ده نبذه مختصره جدا جدا جدا عن الحب

واخر حاجه عايزه اقول شويه نصايح

- لما تتفقو على حاجه مينفعش تخلفو ولو حتي جزء بسيط منها
- الاخلاص اهم حاجه
- لازم تدخلو مبدا الصحوبيه مع التعامل في الحب يعني لازم تعامل حبيبتك على انها صاحبتك وانتيمتك واختك وحبيبتك يعني هي الاول في كل حاجه حتي قبل انت وده في كل حاجه يعني كمان متحكيش حاجه لنفسك واحكيلها هي اعتقد كلامي واضح والعكس طبعا للبنات
- نصيحه مهمه جدا ممكن ولد يشوف بنت تعجبه طبعها بس لبسها مش نافع معاه خالص ده اوك مفيش مشكله حاول تتكلم معاها لو ارتحت وعايز تكمل حببها فيك او حتي خليها تعجب بيك الاول وده بانك تبدا بنفسك وحببها في اللبس اللي انت عايزها تلبسه وواحده واحده هي لوحدها هتغير لبسها والموضوع ده مش بين يوم وليله او حتي اسبوع او شهر ده ممكن ياخد سنه كامله والعكس في البنات طبعا بس ممكن نزود للبنات مشكله السجاير والمخدرات والشيشه وكده بس نصيحتي لاي بنت لو حبيتي حد بيشرب سجاير حاولى معاه يبطلها بس لو مش عارف خليه عل قد ما تقدري يقللها وبلاش تضايقيه بكل شويه بطلها علشان بصراحه زن البنات بيخنق وده عالشيشه كمان لكن موضوع الحشيش والمخدرات وكده فده لازم يبطلها من دون فصال او تفاهم ولو مبطلهاش تعالي على قلبك وسبيه لانه هيسبب مشاكل ده اكيد
- الضحك والهزار في حياه اي اتنين ده شئ اساسي جدا ده ان لم يكن كل دقيقه انا عن نفسي كان الاول من مشاكلي مع محمود هو اني بضحك على الكبيره والصغيره ممكن يكون هو متنرفز جدا او بيتكلم في موضوع مصيري وانا اهزر واضحك بس بعد كده هو اتعودت على كده واتعدي بس مش قوي
بس انا من مبادئئ في الحياه ان لو قابلتني مشكله اضحك وما اهتمش بيها وهي بتتحل لوحدها
- الثقه في نفسك وفي اللي بتحبه لازم تكون موجوده
- بلاش اي اتنين بيحبو بعض يدخلو طرف تالت بينهم في اي حاجه سواء مشاكل او حتي موقف حلو يتحكي
بس اخر حاجه خالص اللى انتشايفه صح ومقتنع بيه ومريحك ومش مزعل حبيبك او حبيبتك اعمله ومحدش ليه عندك حاجه لان محدش هينفعك غيرك انت

وربنا يوفقك ويسعدك انشاء الله ويارب اكون قدرت افيدك

شكرا شكرا شكرا

لكن مردتش على آخر سؤالين

ههههههههههههه
بصراحه مردتش لاني تعبت من كتر الكتابه
بس هرد عليك دلوقتي
بص الموضوع ده مينفعش يتحكم فيه كده لان فعلا ودي حقيقه مش كل اللي لبسهم كده في البنات او الاولاد يبقو اخلاقهم وحشه ممكن يكونو مش واثقين في نفسهم
بص انا عن نفسي معرفش ابدا احكم على الشخص اللي قدامي من لبسه لازم اتكلم معاه وانا ببص لعنيه لان الانسان عندي بعرفه من عنيه اولا ثم كلامه ثم طريقه تفكيره
فعلشان كده انا بنصح اي حد انه ميحكمش على اللي قدامه من مظهره لازم يعرف اخلاقه

ماذا اقول بعد كل ماقيل

صحيح لكن الجواب بيبان من عنوانه يعني لا يمكن أشوف بنت لبسة بنطلون ديق وشعرها مدلدل وحطة في وشها ألوان الطيف وتكون أخلاقها حلوة لأن إلي زي دول بيبقو عايزين الشباب يبصو عليهم وهم فعلا بيبصو عليهم لكن بيشتموهم من وراهم

أما الولاد فأغلب إلي بسقطو ويكهربو دول عيال سيييييس(مش رجالة)

بصراحه عندك حق من حيث الصوره العامه
بص البنات اللي لبسهم صب وشعرهم ملزق وضاربين الوان والاولاد كمان دول مش واثقين في نفسهم
لكن لو مثلا بنت لابسه بنطلون وبادي وتارحه زي بتوع اليومين دول مش لازم تكون مش محترمه او اخلاقها وحشه
لان بجد والله العظيم انا اعرف بنات من بره الكليه ومن جواها كمان بيلبسو كده بس فعلا ملهمش في الطور ولا في الطحين وفعلا بنات محترمه جدا
على فكره معلومه معظم البنات بتلبس كده لمجرد ان ده لبس موضه ولازم تكون كاجوال وكووول لانها بيتهيالها انها بكده هتعجب وهتزيد فرص الجواز والحب واللي هيتجوزها هيكون شاب كاجوال ومواكب الموضه وكده يعني من الاخر ده موضوع راجع للتربيه والبيئه اللي البنات والاولاد عايشين فيها وملهوش دعوه بالاخلاق
يارب تكون فهمت اللي عايزه اوصلهولك

علي فكره طير الغرام عندها حق انتا لو حبيت بنت من الي انتا بتقول عليهم دول و هيا حباك بجد هاتغير من نفسيها و هاتبقي عايز تعمل اي حاجه تريحك دي لو كانت بتحبك بجد انما لو زي بتوع المعاهد البايظه الي تلاقي الولد او البنت كل يوم منتنين مع اتنين شكل اهم حاجه الحب الحقيقي وخد كلامي دا عن تجربه

هههههههههههههههههههههههه

والله كلام جميل لكن مش عارف لية بميل أن البنت تكون لابسة واسع و طرحة وعلى طبيعتها لكن تفضل الحرية الشخصية وحرية التفكير

يمكن عشان إني عشت فترة كبيرة في السعودية فأتعودت أن البنات بيلبسو العبيات السودة وكدة يعني لكن أكيد الفكر المصري هيسود مع الأيام

يسمع من بؤك ربنا
ياعم بس يلبسو واسع و يتحجبو طبعا الكلام دا بعيد عن بنات زراعه ماعدا قله قليله ربنا ها يهديهم باذن الله
و الف شكر علي الموضوع الجامد دا

_يااااااااااااااااه..كل الموضوع ده والردود دى عشان الحب
_دا انتوا مبتكتبوش كدة فى الامتحان..وعلى فكرة بقولها للمرة
الالف مفيش حاجة اسمه حب ..كل ده كلام مالوش لازمة ..مالاخركدة
---------------------------------------
_لما تتجوز تشوف واحدة ..تعجبك تروح تخطبها ..سنة وتتجوز
هو كدة لكن حب بقى وتعيش الوهم فكك من كل ده.
----------------------------------------
_وانا عن نفسى ان شاء الله ..هاتجوز من الصعيد..هاخد ابويا ونروح البلد ..واطلب اى واحدة..وبعد كدة هتتاقلم على طبعى..
وهتبقى حياة كويسة من غير حب..ولابتنجان..وبلاش كلام فى الحب..
عشان انا بتغاظ من اللفظ ده.

boxer كتب:

_يااااااااااااااااه..كل الموضوع ده والردود دى عشان الحب
_دا انتوا مبتكتبوش كدة فى الامتحان..وعلى فكرة بقولها للمرة
الالف مفيش حاجة اسمه حب ..كل ده كلام مالوش لازمة ..مالاخركدة
---------------------------------------
_لما تتجوز تشوف واحدة ..تعجبك تروح تخطبها ..سنة وتتجوز
هو كدة لكن حب بقى وتعيش الوهم فكك من كل ده.
----------------------------------------
_وانا عن نفسى ان شاء الله ..هاتجوز من الصعيد..هاخد ابويا ونروح البلد ..واطلب اى واحدة..وبعد كدة هتتاقلم على طبعى..
وهتبقى حياة كويسة من غير حب..ولابتنجان..وبلاش كلام فى الحب..
عشان انا بتغاظ من اللفظ ده.

ههههههههههههههههههههههههههههههههههههههههههههههههههه
انتا عارف يا عوض الله انتا فكرتني بمين بابو عبود لما راح يتجوز علشان يدخلو الجيش
اهو انتا عايز واحده زي دي الليل بطوله وبعدين انتا م ها تقعد بعد الخطوبه سنه انتا ها تتجوز علي طول
هاتبق عامل زي القطر الي دخل في المحطه من غير ما يزمر